आर'नाइ

मेगनेत (Magnet) आरो मोब्लिब(Electricity) बे मोननैखौबो मानसिया निथिनो हानाय समनिफ्रायनो गुबुनै मिथिबोदों। बे मोननै जाथाइजों जायफोरा सिनायथि जादों बिसोर गासैबो मिथिगौदि बि मोननै जाथाया रोखोमसे नङा। बिसोरनि धोरोमाबो गुबुन। बिसोरखौ गुबुन गुबुन खामानियाव बाहाइनाय जायो।

मेगनेत होनोब्ला, जों मिथिगौ बियो मोनसे लहा बाइदि मुवा जायो गुबुन लहा एबा सोर बाइदि मुवाफोरखौ बोखथाबनो लोगोसे नारनोबो हायो।

मोब्लिबखौ जों स्रां मोननो, फांखा फिदिंनो एबा बाइदि मेसिन सालायनो बाहायो, बिनिखायनो बिखौ बांसिनानो मिथिगौ।

मेगनेत (Magnet) आरो मोब्लिब(Electricity) बे मोननैखौबो मानसिया गोबाव समनिफ्राय आलादा होननानै सानबोदोंमोनब्लाबो दानिया बिसोरखौ बाइदि बिथिंआव बाहायबोनानै मिथिनो मोनबायदि बिसोर गुबुन नङा। बिसोर मोननैबो मोनसेनिफ्राय गुबुन मोनसेसिम सोलायस्लु जानाय धोरोमसो। बिसोर मोननैबो मोनसेया गुबुन मोननैखौ नागारनानै थानो हाया। बिसोर जेब्लाबो ज’यैनो थायो। जों जेब्लाबो बाहाइनाय तारुंजों मोब्लिब खारनायनि लोगोसे मेगनेतबो सोमजियो। मोब्लिब खारनाया सोलायस्लु जायोब्ला मेगनेतनि फोथार आरो गोहो गोनां लाइनफ्राबो सोलायस्लु जायो।
मोनसे मेगनेतावबो जेब्लाबो मोब्लिब थायो। मेगनेतनि मोनसे खर’निफ्राय गुबुन मोनसे खर’सिम इलेक्त्र’न खारनायनि थाखाइसो बियो बोखथाबनाय गोहो मोनो।